Hagen vil kapre søndagen med nettbutikk

Den nye matbutikken på nett opnar onsdag, og frå torsdag vil kundane kunne få varene levert heim, også på laurdagar og søndagar, skriv Dagens Næringsliv.

– Både hentepunkta og bilane våre er innanfor Brustadbu-storleik, så det er ingen reguleringar mot å gjere dette. Du kan trygt seie at vi gjer noko med diskusjonen om søndagsopne matbutikkar, seier sjefen for Marked.no, den tidlegare Orkla-toppen Ole Petter Wie, til avisa.

Debatten om søndagsopne butikkar vart måndag vekt til live då Rema 1000-sjef Ole Robert Reitan melde 120 konkurrerande butikkar for brot på reglane. Han meiner blant anna at butikkane er større enn maksgrensa for såkalla Brustad-buer på 100 kvadratmeter.

Marked.no seier dei vil prøve å kapre helgehandlarane. Rema 1000 reagerer ikkje på søndagsleveringa til den nye nettbutikken.

– Folk skal sjølvsagt få handle mat på nett når dei vil, til liks med klede, sko og bøker, seier Remas kommunikasjonsdirektør Mette Fossum Beyer.

Marked.no er eigd av Hagen-familiens nettbutikk Komplett.no og investeringsselskapa Sundt og Klaveness Marine. Butikken vil opne opp for alle i Oslo-området denne månaden og utvidast til Bergen, Trondheim og Stavanger seinare i år. (©NPK)