Hamilton fjernar nasepiercing etter konflikt med Formel 1-leiinga

Konflikten mellom Hamilton og løpsdirektør i Formel 1, Niels Wittich har gått føre seg sidan VM-runden i Australia tidlegare denne sesongen. No har Hamilton snudd.

– Det er sjukt med alt som går føre seg i verda at dette er det folk bruker energien sin på, seier han før helgas Grand Prix.

I den første treninga på Silverstone-banen kom Hamilton på 2.-plass bak tidlegare Mercedes-kollega Valtteri Bottas.

Årsaka til konflikten handlar om at den britiske Formel 1-stjerna har konkurrert med både nasepiercing og øyreringar i fleire sesongar, sjølv om kroppspiercing har vore forboden i Formel 1 sidan 2004.

– Eg har ingen planar om å fjerne dei, sa 37-åringen etter Melbournes Grand Prix.

Wittich har uttalt at piercingsforbodet er innført for å verne sjåførane med tanke på at ingenting skal hindre dei i å forlate bilen raskt i ein nødssituasjon.

Det internasjonale motorsportforbundets (FIA) reglar seier at «bruk av smykke i form av kroppspiercing eller metall-halskjeder er forbode under konkurransen og kan derfor bli kontrollert før start».

Hamilton kunne vorte bøtelagt for å halde fram med piercinga.

(©NPK)

Lewis Hamilton har teke bort nasepiercingen etter ein langvarig konflikt med Formel 1. Foto: Frank Augstein / AP / NTB