Hasenhüttl månadens PL-manager
Ole Gunnar Solskjær nådde ikkje heilt opp i konkurranse om prisen som månadens manager i Premier League i juli. Den gjekk til Southampton-sjef Ralph Hasenhüttl.
Solskjær var nominert til prisen for tredje gong denne sesongen utan å vinne. Hans Manchester United sikra Champions League-plass etter fire sigrar og to uavgjorde kampar i juli, men det var ikkje nok til å snappe prisen frå Hasenhüttl.
Saints-manageren er den første austerrikaren nokosinne som blir kåra til månadens manager i Premier League. Southampton hadde ein særs imponerande ligainnspurt med mellom anna siger over Manchester City og uavgjort borte mot United i juli.
Hasenhüttls lag var òg utan tap i juli og enda på 11.-plass i Premier League.
Også Josep Guardiola (Manchester City), José Mourinho (Tottenham) og David Moyes (West Ham) var nominerte til prisen.
(©NPK)
Ralph Hasenhüttl er kåra til månadens manager i Premier League. Foto: Ian Walton / AP / NTB scanpix