Hedvig Wessel satsar vidare

Både Wessel og resten av det norske landslaget i kulekøyring har vore ramma av akutt pengemangel, og den 20 år gamle Wessel vurderte alvorleg å byte til frikøyring. I staden sikrar den nye sponsoren, eit entreprenørfirma, den personlege satsinga hennar i fem sesongar.

– Eg er veldig letta. Dei siste to åra har det vore kritisk mot slutten av kvar sesong, og mot midten av sesongane har vi fått beskjed om at det er sannsynleg at det ikkje blir noko lag neste sesong, seier Wessel til Nettavisen.

No har ho fått eit trygt grunnlag som gjer at ho kan satse for fullt dei neste åra.

– Det var sponsoren som ville ha ein så lang avtale, og det er utruleg kult. Det gir den tryggleiken eg treng, og da veit eg at eg kan gjere det som må til.

Den store draumen hennar er å vinne OL-gull i ein skidisiplin der Stine Lise Hattestad og Kari Traa har stått for store norske prestasjonar tidlegare. (©NPK)