Hellas har returnert 90 migrantar til Tyrkia

Migrantane kryssa grenseovergangen Ipsala nordvest i Tyrkia fredag.

Tilbakesendinga skjedde i samsvar med ein returavtale mellom Hellas og Tyrkia. Den inneber at personar utan krav på internasjonal beskyttelse skal sendast tilbake over grensa.

Samtidig seier ein tyrkisk tenestemann at fem greske øyer må tømmast for flyktningar og migrantar før returavtalen med EU trer i kraft.

Han seier at dei som no oppheld seg på øyene, bør flyttast til det greske fastlandet og busetjast andre stader.

Tyrkia vil begynne å ta tilbake nye migrantar og flyktningar som kjem til øyene, idet avtalen er på plass, ifølgje tenestemannen i det tyrkiske utanriksdepartementet. Han seier også at han er overbevist om at avtalen vil føre til at talet på menneske som tar seg sjøvegen til Hellas, vil falle markant. (©NPK)