Henning Solberg dømt til å betale 4,5 millionar kroner

Det skjer snautt to år etter at han inngjekk forlik og betalte den tidlegare Dekknor-partnaren sin Ramiz Safdar 2,6 millionar kroner.

Dei 4,5 millionar kronene han no er dømd til å betale, omfattar bilar, ubetalte fakturaer, kontantuttak og garanti for gjeld, skriv Finansavisen. 600.000 kroner er renter og sakskostnader.

Solberg stilte utan advokat i retten. Han erkjende at han skylde beløpa Dekknor kravde frå han, og han vedgjekk også kontantuttak og at selskapet hadde lånt han pengar til kjøp av tre bilar for til saman 723.000 kroner som ikkje vart betalte tilbake.

Den tidlegare rallyføraren meinte likevel at han hadde innfridd gjelda knytt til ei skyldnarerklæring på 3 millionar kroner frå 2015. Han fekk ikkje medhald av retten i dette.

Trass i dommane har Solberg så langt unngått personleg konkurs.

(©NPK)

Henning Solberg (t.h.), her saman med advokaten sin Hans Kristian Skarphold under eit rettsmøte i 2019, er dømd til å betale 4,5 millionar kroner til Dekknor. Foto: Ole Berg-Rusten / NTB