Høgre-komité vil opprette lærlingfond

(NPK-NTB): I Høgres programutkast som blir lagt fram onsdag, er eitt av punkta auka tilskot for lærlingar. LO er positive, medan NHO held igjen.

npk@npk.no

Publisert: 07.09.2016 kl 07:42

Ifølgje Klassekampen legg Torbjørn Røe Isaksen (H) fram eit utkast til nytt partiprogram, der partiet vil satse på eit fond der bedrifter som tek imot lærlingar vil få økonomisk støtte.

– I det nye programmet har vi to viktige formuleringar. Vi vil ha eit forsøk med lærlingfond, i tillegg til at vi vil auke lærlingtilskotet, seier Isaksen.

Kvart år står mange tusen yrkesfagelevar utan lærlingplass.

– Lærlingar er eit kollektivt gode. Sjølv dei mest hardbarka marknadsøkonomar burde sette pris på det, men i dag har vi denne gratispassasjerproblematikken, seier statsråden.

Trude Tinnlund, som har ansvar for utdanningspolitikken i LO, er positiv til forslaget, men NHO er tilbakehaldne.

– Vi har ikkje konkludert og vil diskutere det internt. Dette er ingen ny idé, og det er argument både for og imot, seier kompetansedirektør Are Turmo i NHO. (©NPK)