Holund fekk anfall i Val Senales

(NPK-NTB): Langrennsløparen Hans Christer Holund fekk problem med pusten under trening og vart frakta til sjukehus i helikopter torsdag.

npk@npk.no

Publisert: 05.11.2015 kl 16:58

Holund er for tida på høgdesamling i Val Senales med resten av allroundlandslaget. Han fekk eit anfall på isbreen og vart sendt til eit sjukehus i Austerrike.

– Eg føler meg svært bra og har blitt godt tatt vare på av alle her på sjukehuset i Zams, seier Holund via landslagstrenar Trond Nystad i ei pressemelding frå Norges Skiforbund.

– Han fekk pusteproblem og smerter i brystet. Fordi dette skjedde oppe på 2.900 meter valde ein å ta han ut med helikopter for å få undersøkt kva som hadde skjedd med han av ein lege. Han er blitt grundig undersøkt, opplyser landslagslege Fredrik Bendiksen til NTB.

Bendiksen var ikkje sjølv til stades i Val Senales torsdag. Han er landslagssjef for kvinnene, og han var med på første del av høgdesamlinga til landslagsløparane.

– Alle svar på prøvene som er gjennomførte på sjukehuset, er tilfredsstillande. Det er førebels ikkje noko klart svar på kva som var årsak til dette, men ingenting tyder på at det er noko alvorleg. Det er ingenting som taler for at han ikkje reiser heim saman med dei andre fredag, seier Bendiksen.