Horneland stadfestar Bendtner-exit
Nicklas Bendtner har spelt den siste kampen sin i Rosenborg-trøya. Det stadfestar trenar Eirik Horneland overfor Eurosport.
Stadfestinga kom dagen etter at Rosenborg slo Vålerenga 3-0 og klatra til niandeplass på eliteserietabellen. Bendtner var ikkje med i RBKs tropp til kampen på Lerkendal.
- Han har meir eller mindre spelt den siste kampen sin for Rosenborg, seier Horneland til Eurosport.
På vidare spørsmål om framtida til dansken no er avklart, svarar RBK-trenaren:
- Ja, det har vi vore einige om ganske lenge.
Det har lenge vore venta at Bendtner ville forlate Rosenborg i overgangspartiet i sommar. Dansken har slite med å få tillit av trenar Horneland denne sesongen.
Nyleg vart den tidlegare Premier League-profilen innvilga nokre dagars ekstra ferie medan lagkameratane starta førebuingane til kampperioden som no ventar. Det vart tolka som eit nytt signal på at Bendtners dagar i Trondheim var talte.
Måndag trente Bendtner som vanleg saman med lagkameratane. Han ønskte i etterkant ikkje å kommentere si eiga framtid overfor Adresseavisen.
(©NPK)
Nicklas Bendtner spelar ikkje fleire kampar for RBK. Foto: Svein Ove Ekornesvåg / NTB scanpix