India og Pakistan feirar 75 års sjølvstende

– Ser vi sjølv den minste tingen som kan knytast til kolonialisme rundt oss, må vi bli kvitt det, sa Indias hindunasjonalistiske statsminister Narendra Modi i ein nesten halvannan time lang tale frå Det raude fortet i New Delhi på frigjeringsdagen måndag.

– Alle indarar, alle regjeringar, alle delar av samfunnet har eit ansvar for at India blir sjølvhjelpt, la han til etter ein salutt frå 21 indiskbygde haubitskanonar.

Masseflukt og massakrar

Delinga av det som tidlegare vart kalla juvelen i den britiske krona, innebar i 1947 ein av dei største folkeflyttingane nokosinne. Nær 12 millionar menneske la ut på vandring, hinduar og sikhar frå Pakistan austover, og muslimar frå India vestover.

Delinga utløyste valdelege samanstøytar mellom medlemmer av dei ulike folkegruppene og massakrar der minst 1 million menneske vart drepne, der titusenvis av kvinner vart valdtekne, og tallause vart lemlesta.

Kashmir og Bangladesh

Medan India enda med 90 prosent av alle fabrikkane i kolonien, sat Pakistan igjen med dei største jordbruksområda. Kven som skulle få eigarskap til Kashmir, har dei to landa hittil utkjempa tre krigar om. Undervegs har begge landa utvikla atomvåpen.

24 år etter delinga enda det også med nye massakrar då dåverande Aust-Pakistan, støtta av India og Sovjetunionen, gjekk til krig og vart til Bangladesh.

Vekst og problem

Den indiske befolkninga har gjennom 75 års sjølvstende vakse frå 340 millionar til 1,4 milliardar, og landet er no i ferd med å passere Kina som det mest folkerike i verda.

India er også ei teknologisk stormakt og ein av dei største og raskast veksande økonomiane i verda, men blir framleis herja av sekterisk vald som går hardast ut over dei 200 millionar muslimane i landet, og som den hindunasjonalistiske regjeringa som har styrt sidan Modi kom til makta i 2014, blir skulda for å ha fyrt opp under.

Samtidig blir kvinner marginaliserte, og offera for seksuelle overgrep er mange. Kastesystemet til hinduane inneber massiv undertrykking av hundrevis av millionar menneske, og Indias klimautslepp har vakse til å bli dei tredje største i verda.

Pakistansk feiring

Pakistan, som feira sjølvstendet sitt søndag, har også sitt å stri med. Leiinga i landet blir skulda for å støtte opprørarar som for over 30 år sidan innleidde eit væpna opprør i den indiskkontrollerte delen av Kashmir, men slit sjølv med å få kontroll over Taliban-opprørarar langs grensa mot Afghanistan.

Brota på menneskerettane er massive også i Pakistan, og pakistansk politikk kan med få ord karakteriserast som heller kaotiske.

Søndag feira millionar av pakistanarar lausrivinga frå britane med fest i gatene, flagg og fyrverkeri, og ei rekkje offisielle seremoniar landet over.

Statsminister Shehbaz Sharif lova i talen sin å gjere Pakistan til ei økonomisk stormakt og oppmoda alle parti til å samarbeide for å nå denne visjonen, eit heller utopisk ønske i den politiske situasjonen i dag.

– Om vi kan bli ei atommakt, så kan vi også bli ei økonomisk makt, men då må vi streve dag og natt, sa Sharif i talen sin.

(©NPK)

Politifolk i den indiske delstaten Assam markerte måndag 75-årsdagen for indisk sjølvstende. Foto: AP / NTB

Indias hindunasjonalistiske statsminister Narendra Modi blir skulda for å fyre opp under motsetningar mellom folkegrupper, noko som først og fremst går ut over dei 200 millionar muslimane i landet. Måndag markerte han 75 års sjølvstende ved å halde tale frå Det raude fortet i New Delhi. Foto: AP / NTB

Statsminister Narendra Modi og hans hindunasjonalistiske Bharatiya Janata (BJP) har styrt India sidan 2014. Foto: AP / NTB

India og Pakistan har utkjempa tre krigar om Kashmir. Denne guten i Jammu i den indiskkontrollerte delen deltok måndag i den indiske feiringa av 75-årsdagen for lausrivinga frå britane. Foto: AP / NTB

Millionar av pakistanarar feira søndag sjølvstendet frå dei britiske koloniherrane for 75 år sidan, blant anna i Karachi. Foto: AP / NTB