Ingen omkamp mellom Molde og Odd

På tampen av eliteseriekampen i Molde søndag 21. august skalla Steffen Hagen frå Odd saman med Björn Bergmann Sigurdarson frå heimelaget. Begge spelarane blei liggjande nede.

Dommar Ken Henry Johnsen valde å ikkje stoppa spelet, og i det etterfølgjande angrepet scora Molde til 3– 2. Odd-leiinga meinte spelet burde vore stoppa på grunn av dei to hovudskadane, og som følgje av at legen til Molde var langt inne på banen då laget scora målet sitt.

Odd hevda oppførselen til dommaren var kampavgjerande, men doms- og sanksjonsutvalet slår fast at det ikkje har vore nokon grove feil ved forståinga til dommaren av regelverket, og protesten blei difor avvist.

– Odd er usamd i dommen, men det viktigaste har vore å få søkjelys på tryggleiken til spelarane. Det har vi oppnådd i denne saka, seier den daglege leiaren til Odd, Einar Håndlykken til nettstaden til klubben. (©NPK)