Ingen vil vere saman med Kristiansand

Måndag gjekk innbyggjarane i Birkenes, Lillesand, Søgne og Songdalen til vallokala for å stemme om det såkalla K5-alternativet. For Søgne og Songdalen var det også eit alternativ å berre velje kvarandre eller fortsette som i dag.

Dersom folket får bestemme, blir det altså ingen ny storkommune på Sørlandet. Nei-prosenten var høg både i Lillesand (66), Birkenes (63), Songdalen (55) og Søgne (62,5), melder fleire medium.

I Søgne stemte 9 prosent for å slå seg saman med Songdalen, mens K5-alternativet fekk 28,5 prosent. I Songdalen ønskte 9 prosent å slå seg saman med Søgne, mens 35,3 ønsket seg ein storkommune med Kristiansand.

I Kristiansand skal det ikkje haldast noka folkeavstemming om samanslåing.

I Agder-fylka sa dei nei også i Farsund, Flekkefjord, Kvinesdal og Iveland, i tillegg til dei som stemte over K5-alternativet. Nei vart det også i Trøgstad i Østfold og i Kvinesdal i Vest-Agder, skriv Fædrelandsvennen.

I Gjemnes i Møre og Romsdal stemte 51 prosent mot samanslåing.

I Levanger i Nord-Trøndelag vart det fleirtal for samanslåing med Verdal på 68,8 prosent. I Verdal er ikkje ønsket om å slå seg saman like sterkt, 24,4 prosent var for. 71,3 prosent ønskjer å fortsette som før, melder NRK. Innbyggjarane i Holtålen stemte mot samanslåing.

I Os i Hedmark stemte 55 prosent nei til å slå seg saman med Røros. I Røros var lysta på ei samanslåing større – her vart det ikkje halde folkeavstemming, men ei innbyggjarundersøking viste at 63 prosent ønskte seg ein samanslåing, skriv Adresseavisen.

Heller ikkje i Flakstad og Moskenes i Nordland hadde ein lyst til å slå seg saman med andre kommunar. Det hadde derimot innbyggjarane i Vestvågøy, der 61,4 prosent stemte for ein samanslåing. I Troms viste resultatet frå Gratangen at 73,8 prosent ønskjer å stå åleine.

(©NPK)