Internasjonal demokratikonferanse på Utøya

Oslosenteret arrangerer konferansen saman med Arbeidarpartiet og Kristeleg Folkeparti.

Dei om lag 80 deltakarane er involvert i å vidareutvikla politiske parti og partisystem, og Utøya er bevisst valt som konferansestad.

– I tillegg til det fatale angrepet på unge politisk engasjerte menneske med verst tenkjeleg utfall blei også demokratiet og politiske parti som institusjon ramma og seinare sett på prøve, heiter det i ei pressemelding frå Oslosenteret, som tidlegare heitte Oslosenteret for fred og menneskerettigheter.

Også forskarar og organisasjonar som arbeider med demokratistøtte og donatorar er med på konferansen.

I år er det fem år sidan åtaket på AUFs sommarleir på Utøya der 69 menneske blei drepne. Sidan er det reist nye bygningar på øya og minnestaden Lysningen opna i fjor sommar.

Då tok også AUF opp att tradisjonen med sommarleirar på øya, som ligg i Tyrifjorden og er eigd ungdomspartiet til Arbeidarpartiet.

Rundt delar av det gamle kafébygget, der 13 ungdommar blei drepne, blir det no reist det som blir kalla Hegnhuset. Det skal bli eit læringssenter der historia om 22. juli blir fortalt. Huset står klart like før femårsdagen til sommaren.

På nettsidene til Utøya blir det opplyst at stadig fleire organisasjonar legg konferansar og arrangement til staden. Staden samarbeider med Sundvolden Hotel om tilbodet. (©NPK)