IOM: Over 700 passasjerar i båtforlis utanfor Kreta

– Over 250 menneske er berga frå eit forlist skip utanfor kysten av Kreta. Det er rekna med at båten forlét Afrika med minst 700 migrantar om bord, opplyser Den internasjonale organisasjonen for migrasjon (IOM) i ei pressemelding seint fredag føremiddag.

Båten kantra i Middelhavet sør for øya Kreta fredag morgon, og redningsoperasjonen går framleis føre seg. Greske styresmakter opplyste tidlegare på dagen at tre menneske var funne døde, mens 302 var berga opp av vatnet i live.

Båten blei funnen halvvegs sokke i internasjonalt farvatn, rundt 75 nautiske mil sør for Kreta og innanfor Egypts søke- og redningsområde.

– Talet på menneske i havsnaud kan vere mange hundre. Mange ligg i sjøen, og båtar som har komme til, kastar ut redningsvestar og prøver å redde migrantane, sa ein talsmann for den greske kystvakta kort tid etter at alarmen gjekk.

Hellas har sendt fleire patruljebåtar og to helikopter til staden, mens fire skip som var i nærleiken, tar del i redningsaksjonen.

Den relativt korte båtreisa frå den tyrkiske kysten til greske øyer har vore den føretrekte ruta for mange av flyktningane som kom til Europa fram til den såkalla Balkan-ruta blei stengt i vinter.

Sidan har stadig fleire båtflyktningar prøvd å komme seg til Europa frå den nordafrikanske kysten. Den sjøvegen er mykje lengre og farlegare. Over 1.000 flyktningar og migrantar har drukna på veg frå Libya til Italia dei siste ti (©NPK) dagane