Irak-soldatar kom heim til medalje

(NPK-NTB): I alt 59 norske soldatar som har gjort teneste i Irak, fekk medalje då dei kom heim til Noreg fredag.

Publisert: 26.02.2016 kl 15:46

Medaljeseremonien skjedde i Ridehuset på Akershus festning. Generalløytnant Rune Jakobsen, som er sjef for Forsvarets operative hovudkvarter, overrekte medaljane.

Regjeringa var representert ved forsvarsminister Ine Eriksen Søreide (H), som heldt tale til soldatane. Også forsvarssjef Haakon Bruun-Hanssen og Hærens generalinspektør Odin Johannessen var til stades.

Hovudoppgåva til dei norske soldatane i Norwegian Task Unit II har vore å trena irakiske tryggingsstyrkar i grunnleggjande soldatdugleik. (©NPK)