Italiensk dommar på Ullevaal tysdag
Gianluca Rocchi (45) frå Italia dømmer EM-kvalifiseringskampen på tysdag i fotball mellom Noreg og Sverige på Ullevaal stadion.
Gianluca Rocchi (45) frå Italia dømmer EM-kvalifiseringskampen på tysdag i fotball mellom Noreg og Sverige på Ullevaal stadion.
Det blir ikkje første gong Rocchi dømmer eit nordisk nabooppgjer i EM-kvalifisering på Ullevaal. Han var kampleiar då Noreg og Danmark spelte 1-1 der i 2011. Også den kampen vart spelt 26. mars, altså for akkurat åtte år sidan.
Rune Almenning Jarstein vakta Noregs mål. Han er den einaste i dagens tropp som var i den norske troppen den gongen.
I august 2010 dømte Rocchi meisterligakvalifiseringa mellom Rosenborg og FC København på Lerkendal. Markus Henriksen noterte mål og assist då RBK vann 2-1, men FCK tok seg til gruppespel på bortemålsregelen etter 1-0 i returkampen.
Rocchi har vore Fifa-dommar sidan 2008. I fjor vart han kåra til årets dommar i Serie A. Han dømte den europeiske supercupen mellom Real Madrid og Manchester United i 2017 og var kampleiar i fleire oppgjer under VM-sluttspelet i Russland i fjor.
Han får med seg Alberto Tegoni og Giorgio Peretti som assistentar på Ullevaal, medan Daniele Doveri er fjerdedommar.
(©NPK)
Gianluca Rocchi dømmer EM-kvalifiseringskampen mellom Noreg og Sverige tysdag. Her deler han ut eit gult kort i europaligakampen mellom Zenit St. Petersburg og Villarreal tidlegare i månaden. Foto: Dmitri Lovetsky, AP / NTB scanpix