Jagland kritisk til dansk «smykkelov»

Det danske folketinget vedtok tysdag nye innstrammingar som mellom anna inneber at styresmaktene kan beslagleggja verdisaker frå asylsøkjarane for å dekkja utgifter under asylbehandlinga.

Til VG seier Jagland at det kan bli aktuelt for Europarådet å vurdera om dette bryt med internasjonal rett.

– Etter Den europeiske menneskerettskonvensjonen er det ikkje lov å konfiskera eigedom. Det er også stadfesta gjennom ei lang rekkje dommar i Menneskerettssdomstolen i Strasbourg, seier Jagland.

– Ein kan sjølvsagt be asylsøkjarane om å bidra til sitt eige opphald, men ein kan faktisk ikkje konfiskera eigedom for deretter å bruka det til betaling, legg han til.

Han peikar på at ei eventuell vurdering frå Europarådet er avhengig av at danske domstolar først seier ein dom. (©NPK)