Jente (8) fekk stor laks med liten lakris

Freistinga vart for stor for den fem kilo tunge ruggen då han såg lakrisbiten som Guro Haugen (8) hadde festa på fiskekroken sin.

Det tok berre ti minutt frå snøret var kasta ut til ho fekk napp – og laksen låg og sprella på land, med både krok og lakris i kjeften.

Det var tysdag at far og dotter drog på fisketur i Gaula, like ved der dei bur på Kotsøy i Sør-Trøndelag, skriv Adresseavisen..

– Ho ville grave etter makk, men vi hadde ikkje tid. Eg sa at det var nok med berre sluken, men ho meinte at fisken trengde noko godt. Vi hadde med lakris som vi skulle ete sjølv, og då fann ho ut at ho skulle prøve lakris på kroken, seier faren Bjørn Ivar Haugen.

Og lakris fungerte heilt etter planen, for kort tid etter fekk Guro, med litt hjelp frå pappa, den godtesjuke laksen på land.

Til avisa seier jenta at ho allereie gler seg til fleire fisketurar i sommarferien og at ho skal fortsette å ha lakris på kroken. Og neste gong håpar ho på større fangst.

– Neste gong håpar eg at eg får ein ... blåkval, seier den stolte åtteåringen. (©NPK)