Jo Lunder blir ikkje varetektsfengsla
(NPK-NTB): Oslo tingrett varetektsfengslar ikkje tidlegare Vimpelcom-sjef Jo Lunder, som er sikta for korrupsjon.
– Dette er ein gledeleg dag for Lunder. Det er sjeldan tingretten ikkje følgjer ønsket til påtalemakta om varetektsfengsling, seier hans forsvarer Cato Schiøtz til NRK.
Lunder er sikta for ei utbetaling på 30 millionar dollar frå Vimpelcom til ein konto i Sveits, som høyrer til det usbekiske selskapet Takilant. Utbetalinga skjedde i 2011, to månader etter at Lunder hadde byrja som sjef i selskapet.
Takilant er eit såkalla postkasseselskap, som i realiteten skal vere eigd av presidentdottera i Usbekistan.
Pengane skal ha vore betaling for to rapportar om den usbekiske telemarknaden. Men ifølgje Dagens Næringsliv bestod store delar av rapportane av materiale som var klipte frå opne nettkjelder som Wikipedia og blogginnlegg, i tillegg til powerpoint-presentasjonar frå Vimpelcoms eiga telekom-merkevare Beeline. (©NPK)