Kaos etter skuleangrep i Sverige

(NPK-NTB-TT): Augevitne fortel om fullt kaos ved skulen der ein mann gjekk til angrep med sverd i Trollhättan. – Folk gret og prøvde å springe gjennom sperringane, seier ein fotograf.

npk@npk.no

Publisert: 22.10.2015 kl 11:44

– Det var fullstendig kaos. Fleire hundre menneske var ved hovudgata som går gjennom bydelen Kronogården. Folk gret og prøvde å springe inn bak sperringane, så politi og vakter hadde hendene fulle, seier fotograf Stefan Bennhage i lokalavisa TTELA.

Han kom til åstaden ein dryg halvtime etter hendinga og fortel at mange ambulansar og politibilar då allereie var på plass.

– Ein ambulanse klarte ikkje å bremse og køyrde rett inn i skuleveggen, seier Bennhage.

Fotografen seier han såg ein elev bli frakta inn i ein ambulanse. To ambulansar køyrde frå staden i full fart.