Kasper Schmeichel klar for Nice

Den danske landslagsmålvakta Kasper Schmeichel forlèt Premier League og Leicester for fransk fotball og Nice. Han har spelt 478 kampar for Leicester.

sjur.natvig@ntb.no/bent.tandstad@npk.no

Publisert: 03.08.2022 kl 20:03

Nice opplyser om overgangen på Twitter.

«Vi er avhengige av han for å nå måla våre», skriv klubben og omtaler den meritterte målvakta som ein viking.

35-åringen har spelt heile karrieren sin i Storbritannia og legg bak seg elleve år i Leicester. Han var med og vann det sensasjonelle ligagullet i 2015/16-sesongen. Klubben takkar målvakta på nettsidene sine.

– Eg veit at alle Leicester-supporterar deler respekten vi har for Kasper etter alt han har vunne, og eg ønskjer han lykke til vidare i karriere, seier styreleiar Aiyawatt Srivaddhanaprabha.

Det er ikkje kjent kor lang kontrakt dansken har signert.

(©NPK)

Kasper Schmeichel er klar for Nice i fransk fotball. Foto: Liselotte Sabroe / Ritzau Scanpix / NTB