Kenya vil stengje den største flyktningleiren i verda

Avgjerda blir fordømt av nasjonale og internasjonale menneskerettsgrupper og organisasjonar som arbeider med flyktningar.

Det bur cirka 328.000 menneske i Dadaab-leiren, av dei er dei aller fleste frå Somalia. Kenyanske styresmakter skuldar den somaliske islamistgruppa al-Shabaab for å gøyme seg blant flyktningane i leiren og for å drive rekrutteringsverksemd der, noko styresmaktene meiner utgjer ein fare for Kenyas tryggleik.

Ifølgje innanriksminister Joseph Nkaissery har al-Shabaab planlagt tre store angrep frå Dadaab. Leiren er også ein kanal for våpensmugling, seier han.

Regjeringa kunngjorde sist veke at dei hadde planer om å stengje både flyktningleiren i Dadaab og leiren i Kakuma nordvest i landet som husar 190.000 menneske, dei fleste av dei sørsudanarar. Innanriksdepartementet opplyste samtidig at dei har avvikla departementet for flyktningsaker. Onsdag sa likevel Nkaissery at Kakuma-leiren ikkje ville bli stengt fordi den ikkje utgjer ein sikkerheitsrisiko.

FN har oppfordra Kenya til å revurdere stenginga, og talsmann Stephane Dujarric har bedt Kenyas regjering unngå alle handlingar som er i strid med dei internasjonale forpliktingane landet har. (©NPK)