Kevin Spacey dømd til å betale 31 millionar dollar til serieskaparar

Produksjonsselskapet MRC søkte om erstatning etter at dei fjerna Spacey frå hovudrolla i den populære Netflix-serien, noko som førte til at dei måtte endre oppsettet i den sjette sesongen i serien.

Serieskaparane vart nøydde til å skrive ut Spaceys rollefigur frå sesongen, og redusere talet på episodar frå tretten til åtte.

Retten i Los Angeles i USA meinte at skodespelaren braut kontrakten med produksjonsselskapet på grunn av åtferda han vart skulda for.

Spacey må betale 29,5 millionar dollar for kontraktsbrotet og resten i kostnader og gebyr, ifølgje domstolen.

I kjølvatnet av metoo-rørsla i 2017 kom det ei rekkje skuldingar om trakassering og seksuelle overgrep mot Spacey. Nokre av skuldingane kom frå kollegaer som jobba med innspelinga av «House of Cards».

I ein domstol i London førre månad erklærte Spacey seg ikkje skuldig i skuldingar om seksuelle overgrep mot tre menn for nesten 20 år sidan. Spacey har så langt avvist alle skuldingane om overgrep og trakassering som er retta mot han.

(©NPK)

Hollywood-stjerna Kevin Spacey er dømd av ein amerikansk domstol til å betale 31 millionar dollar til produksjonsselskapet bak Netflix-serien «House of Cards». Arkivfoto: Frank Augstein / AP / NTB