Joe Biden har komme til Aust-Asia – kan bli møtt med atomprøvesprenging

– Det er ein reell risiko for ein eller annan provokasjon medan vi er i regionen, anten i Sør-Korea eller Japan, sa USAs nasjonale tryggingsrådgivar Jake Sullivan til pressa om bord på Air Force One.

Presidentflyet landa i Sør-Korea fredag, før det dreg vidare til Japan søndag. I forkant av besøket har det komme signal om at regimet i Nord-Korea kan nytte høvet til å få ekstra merksemd rundt ei rakettoppskyting – eller til og med ei atomprøvesprenging.

– Førebuingane til ein kjernefysisk test er ferdige og dei ventar berre på det rette tidspunktet, sa den sørkoreanske politikaren Ha Tae-keung etter eit møte med etterretningstenesta i landet denne veka.

Regimet i Nord-Korea skal ha lagt planar for atomvåpen-testen trass i koronautbrotet som skaper store utfordringar for landet.

– Vi veit korleis vi skal svare. Vi har ikkje berre snakka med våre allierte, men også med Kina, seier Sullivan.

Kinesisk militærøving

Også Kina ser ut til å nytte det amerikanske presidentbesøket til å vise musklar i regionen. Torsdag opplyste sjøfartsstyresmaktene i øyprovinsen Hainan at det går føre seg ei kinesisk militærøving i omstridde farvatn i Sør-Kina-havet.

Havområdet har lenge vore kime til konflikt, både mellom USA og Kina, men også andre land i regionen.

Kina meiner at heile Sør-Kina-havet tilhøyrer dei, men fleire andre land har også gjort krav på delar av området. USA har ikkje teke stilling til dei territorielle krava, men står hardt på retten til å bevege seg fritt i området og seglar ofte store marinefartøy tett på kinesiske øyar med militærbasar.

Biden blir i Aust-Asia i heile seks dagar. Han ønskjer å bruke turen til å markere seg i regionen, der Kinas aukande makt, både militært og økonomisk, har utfordra USA.

Undervegs skal han ha samtalar med statsleiarane i Sør-Korea og Japan, og dessutan eit møte med den såkalla «firarbanden» i Tokyo – ei gruppe beståande av Australia, India, Japan og USA.

USA har nærare 30.000 soldatar stasjonerte i Sør-Korea og rundt 55.000 i Japan, og han skal også besøkje nokre av basane.

Taiwan-åtvaring?

Den siste tida har Biden og USA hatt hovudmerksemda si på Russland og Europa som følgje av krigen i Ukraina. Like før avreise frå Washington møtte presidenten statsleiarane i Sverige og Finland som no ønskjer seg inn i Nato.

Det kvite hus har også opplyst at Biden kjem til å godkjenne ein massiv våpen- og bistandspakke til Ukraina på 40 milliardar dollar medan han er i Asia.

USA håpar at den høge diplomatiske og økonomiske kostnaden krigen i Ukraina har fått for Russland, vil vere ei åtvaring til Kina mot å gjere noko overfor Taiwan. Kina ønskjer kontroll over øya, og konflikten har lenge vorte sett på som ei tikkande bombe.

Tidlegare i månaden sa CIA-sjef William Burns at styresmaktene i Beijing følgjer nøye med.

– Eg trur at dei har vore spesielt opptekne av måten den transatlantiske alliansen har komme saman for å påføre økonomiske tap for Russland som følgje av aggresjonen, sa han.

– Vil bli høyrt i Beijing

Tryggingsrådgivar Sullivan seier at Biden-administrasjonen ikkje ønskjer å konfrontere Kina noko særleg under turen, men at dei heller ønskjer å bruke diplomatiet til Biden til å vise at Vesten og dei asiatiske partnarane deira ikkje vil la seg splitte eller svekkjast.

Han viste mellom anna til samarbeidet med Sør-Korea og Japan om sanksjonane mot Russland, og meiner at denne beskjeden vil «bli høyrd i Beijing».

– Men det er ikkje ein negativ beskjed, og han er ikkje retta mot noko spesielt land, seier han.

Sullivan avviser at ei eventuell nordkoreansk atomprøvesprenging vil vere eit tilbakeslag for Bidens diplomati.

– Det vil understreke ein av hovudbodskapane vi sender på denne turen, som er at USA er her for våre allierte og partnarar.

(©NPK)

USAs president Joe Biden kom til Osan-flybasen i Pyeongtaek i Sør-Korea fredag. Foto: Lee Jin-man / AP / NTB

USAs president Joe Biden helser på Sør-Koreas utanriksminister Park Jin ved framkomst på Osan Air Base i Pyeongtaek. Foto: Evan Vucci / AP / NTB

Air Force One landar i Sør-Korea. Foto: Lee Jin-man / AP / NTB.

Biletet frå nordkoreanske styresmakter viser det dei sjølv seier er ei testoppskyting av ein interkontinental ballistisk rakett av typen Hwasong-17 den 24. mars i år. Det er venta at Nord-Korea kan finne på å skyte opp nye rakettar under Joe Bidens besøk i Aust-Asia. Foto: Det nordkoreanske nyheitsbyrået KCNA via AP / NTB

Det er venta at Nord-Koreas leiar Kim Jong-un kan nytte Bidens Asia-besøk til å skape meir blest rundt ei rakettoppskyting, eller til og med ei atomprøvesprenging. Foto: Korean Central News Agency/ Korea News Service / AP / NTB.