Kommunestyret i Kinn vedtok å la «den raraste kommunen i Noreg» bestå

Dei to kommunane vart frivillig slått saman i 2020. Kinn har vorte omtalt som «Noregs raraste kommune». Flora og Vågsøy deler ikkje kommunegrense, men ligg på kvar si side av Bremanger – som ikkje ønskte å bli slått saman med naboane.

I folkeavstemminga stemde 3.427 personar for oppløysing, medan 3.471 stemde for at kommunen skal haldase oppe, viser oppteljinga frå Kinn kommune. I prosent blir det eit knapt fleirtal på 49,14 prosent mot 48,52 prosent. Valdeltakinga var også relativt låg.

Kinn kommunestyre fekk siste ord i saka, og dermed består «Noregs raraste kommune». Berre 18 av 39 representantar ønskte å dele kommunen. Eit tredje forslag vart fremja under møtet og gjekk ut på å la avgjerda bli teke av Kommunal- og moderniseringsdepartementet, men dette fallet.

Det lokale Senterpartiet håpar Stortinget vil overprøve vedtaket i kommunestyret.

– Vi blir overkøyrde for all framtid. Det er betre å skiljast no enn å vente til ein blir bitre fiendar, sa Sps Fredrik Egeberg, ifølgje NRK.

Vedtaket blir no oversendt som ei innstilling til statsforvaltar i Vestland, Liv Signe Navarsete. Saka skal også handterast av kommunalminister Sigbjørn Gjelsvik (Sp).

Fakta om Kinn kommune

• I 2020 vart kommunane Flora og Vågsøy i Vestland slått saman til Kinn. Samanslåinga var frivillig.
• Kinn har vorte kalla Noregs raraste kommune. Flora og Vågsøy deler ikkje kommunegrense.
• Bremanger, som ligg mellom dei to kommunesentera, ønskte ikkje samanslåing.
• Kommunesentrene Måløy og Florø ligg 100 kilometer frå kvarandre. Reisetida er meir enn 1 time med hurtigbåt og meir enn 2 timar med bil.
• Målet med samanslåing var sterkare befolkningsvekst og næringsutvikling.
• Avgjerda vart seinare kritisert. Ein såg ikkje dei effektane ein hadde ønskt, ifølgje ein rapport frå Kommunekonsult.
• Reiseavstanden er så lang at Flora og Vågsøy ikkje har felles bustad- og arbeidsmarknad.
• Ein rapport bestilt frå Statsforvaltaren i Vestland har konkludert med at det blir dyrt å dele opp kommunen.
• Regjeringa har lova å stille med 15 millionar kroner for å dekkje delar av rekninga dersom Kinn går inn for oppdeling.
• Ei rådgivande folkeavstemming vart gjennomført 1. september.
• Kinn kommunestyre behandla folkeavstemminga onsdag 7. september. Dei vedtok å la kommunen bestå. (NPK-NTB)

(©NPK)