Kommunetilsette får ikkje fri sankthansdagen i Tønsberg

Ti fagforeiningar i Tønsberg gjekk rettens veg for å få tilbake fri sankthansdagen, som dei mista i 2010. No har Tønsberg tingrett frikjent kommunen – og dei tilsette må betale sakskostnader på 97.063 kroner, fortel NRK.

Tidlegare hadde alle kommunetilsette i Tønsberg bortsett frå dei som jobbar i skule- og helsesektoren, fri 24. juni.

I 2010 vart ordninga avskaffa, i staden fekk dei tilsette ein ekstra fridag dei skulle bruke på helsefremjande tiltak. Denne avtalen vart avvikla i 2014, og då meinte dei kommunetilsette at dei skulle ha tilbake fri på sankthansdagen.

I dommen står det at retten ikkje fann avgjerda spesielt vanskeleg. Retten meiner også at den økonomiske betydninga for tilsette i Tønsberg kommune er liten, og at tilsette i betydeleg grad kan ta fri sankthansdagen ved avspasering. (©NPK)