Annonse

Kongeleg tenning for ungdoms-OL

(NPK-NTB): Prinsesse Ingrid Alexandra (12) tenner fredag elden for ungdoms-OL på Lillehammer. Pappa Haakon gjorde det same for OL i 1994 og blir svært aktiv under leikane elles.

Ein titt på programmet for kongefamilien viser at både kongeparet og kronprinsfamilien vil bidra tungt til ungdoms-OL, noko som utvilsamt vil auke interessa for arrangementa. Særleg er kronprins Haakon engasjert: Sidan juni 2012 har han vore Kulturdepartementets representant i hovudkomiteen for leikane. Han har to grunner til å engasjere seg:

– Kombinasjonen av eit stort og komplekst arrangement og at det blir arrangert av og for unge menneske. Det gjorde ungdoms-OL interessant og spennande. Eg fekk lyst til å bidra, seier kronprins Haakon til Gudbrandsdølen Dagningen (GD).

Dagen før den offisielle opninga av leikane blir det generalprøvar i Lysgårdsbakken. I tillegg skal dronning Sonja på ettermiddagen torsdag opne Lillehammer Olympiske museum på Maihaugen, der kronprinsesse Mette-Marit også vil vere til stades.

Kronprinsen set den første steinen når leikane tjuvstartar i curlinghallen fredag med familien på sidelinja. Sjølve opninga av ungdoms-OL er det kong Harald som leier fredag kveld, når prinsesse Alexandra tenner OL-elden, som har reist heile vegen frå Hellas, gjennom heile Noreg og til Lillehammer. Elden blir tend med same fakkel som under OL i 1994, nøyaktig 22 år og to timar etter at kronprins Haakon gjorde det same. (©NPK)