Kongen om Durek Verrett: – Det er ein kulturkollisjon vi no merkar

Han fekk tysdag spørsmål om det er eit problem at Durek Verrett bruker kongelege titlar og omgrep i sitt kommersielle virke.

– Eg trur ikkje det har sokke heilt inn kva vi meiner enno, men vi er i prosess, og dette kjem til å løyse seg etter kvart. Vi blir betre og betre kjende, og vi kjem til å snakke meir med han, som vi gjer i ein familie, sa kongen

Kong Harald og dronning Sonja møtte tysdag ettermiddag pressa på kaien i Sykkylven i samband med ein tre dagar lang fylkestur i Møre og Romsdal. Der fekk kongeparet fleire spørsmål om Durek Verrett, også kalla sjaman Durek, som er forlova med prinsesse Märtha Louise.

– Det kjem nok til å løyse seg. Men eg lovar ikkje at det løyser seg i morgon, sa kongen.

Han avviste at Verretts bruk av kongelege titlar er ei utfordring for kongehuset.

– Det er stor forskjell å vere i Amerika og vere i Noreg, trur eg, påpeika dronninga.

– Det er ein kulturkollisjon vi no merkar, trur eg, sa kongen.

Sjamanverksemd

Durek Verrett har fått kritikk for måten han har opptredd på som sjaman, også etter at han forlova seg med Märtha Louise.

Nyleg hevda han at ein spesiell medaljong gjorde han frisk etter å ha vorte smitta av korona. Medaljongen blir seld på nettsida hans for over 2.000 kroner.

– Det har vore fleire kontroversielle episodar med Durek Verrett, mellom anna påstandar om helsebot av sjukdom. Har kongeparet nokon tankar om virket hans som sjaman?

– No er eg så heldig eller uheldig at eg har hatt erfaring nyleg med å vere sjuk. Og i dette landet har vi eit heilt utmerkt helsesystem, som eg då kom borti igjen. Eg kan berre seie at det er veldig bra å ha eit sånt helsesystem som vi har i Noreg. Og sjølv Durek Verrett har nytt godt av helsesystemet vårt, seier kongen til NTB.

– Og prisar det, skyt dronninga inn.

– Han merkar det nok

Durek Verrett har også fortalt at han har opplevd rasisme i Noreg.

I ei sending på Instagram i juni uttalte han mellom anna at folk ikkje vil sjå ein svart mann i kongefamilien.

– Eg er ikkje Durek, så eg veit ikkje kva han har opplevd. Men det er ikkje tvil om at i krokar og krikar i Noreg, finst det ein del som driv med den slags. Han merkar det nok. Det gjer nok fleire som ikkje er etnisk norske her i landet, seier kongen på spørsmål frå NTB.

(©NPK)

Kong Harald og dronning Sonja under pressemøtet i Sykkylven på første dagen av det tre dagar lange fylkesbesøket i Møre og Romsdal. Foto: Lise Åserud / NTB