Annonse
Annonse
Annonse

Kongeparet: Vi må gjere det vi kan for flyktningane

(NPK-NTB-Bibiana Piene): Besøket på det nye mottakssenteret for asylsøkjarar i Råde i Østfold gjorde inntrykk på kongeparet. – Vi må gjere det vi kan for å hjelpe dei, slår kong Harald fast.

Annonse

Kongen minner om at Noreg ved minst to høve har nytt godt av at andre har tatt imot norske flyktningar.

– No må vi vise kva som bur i oss, seier han.

Kongeparet besøkte onsdag mottakssenteret for asylsøkjarar i Råde i Østfold. Senteret vart opna sist fredag.

Der vart dei helsa velkommen av blant andre justisminister Anders Anundsen (Frp) og sjefen for Utlendingsdirektoratet (UDI), Frode Forfang.

– Det er heilt sjølvsagt. Det må ein, seier dronning Sonja.

Ho er spesielt imponert over samarbeidet mellom dei ulike etatane som har vore med på å stable mottakssenteret på beina på rekordtid i dei gamle Smart Club-lokala i Råde, og ho peikar på at det er mange element som må på plass for å få alt til å gli så effektivt og skånsamt som mogleg.

Eit spesielt inntrykk gjorde møtet med ein flyktningfamilie frå Irak med fire barn og eitt på veg.

– Dei hadde komme hit med eit ønske om at barna kunne vakse opp her med god skule og moglegheita til eit verdig og godt liv. Det er rørande, seier dronninga. (©NPK)