Kongsberg-tiltalte Espen Andersen Bråthen ønskjer ikkje å forklare seg meir i retten

Rettssaka starta i Buskerud tingrett i Hokksund onsdag. Etter at Bråthen hadde forklart seg i omtrent to timar, gav han beskjed om at han ikkje lenger ville forklare seg.

Då saka starta igjen torsdag, gjentok Bråthen at han ikkje ville forklare seg meir.

– Eg vel å ikkje forklare meg noko meir, sa Bråthen med fast røyst.

Dommar Liv Synnøve Taraldsrud spurde Bråthen om avgjerda hans berre gjaldt for torsdagen, eller alle dei vidare planlagde forklaringane som påtalemakta har lagt opp til i den fire veker lange rettssaka.

Den tiltalte 38-åringen gjentok at han ikkje ville forklare seg noko meir under rettssaka.

Bråthen er tiltalt for fem knivdrap, elleve drapsforsøk med pil og boge og fleire andre forhold i Kongsberg 13. oktober i fjor. I dei psykiatriske undersøkingane av han etter at han vart arrestert, er det påvist at han lir av paranoid schizofreni, og at han truleg var utilrekneleg då drapa og pil og boge-angrepa skjedde.

Påtalemakta har innstilt på at Bråthen skal overførast til tvunge psykisk helsevern, noko også Bråthens forsvarar, advokat Fredrik Neumann, støttar.

Aktor Andreas Christiansen i rettslokalet i Hokksund i Buskerud tingrett torsdag morgon på andre dag av rettssaka mot Espen Andersen Bråthen. Bråthen er tiltalt for fem knivdrap, elleve drapsforsøk med pil og boge og fleire andre forhold i Kongsberg 13. oktober i fjor.
Foto: Lise Åserud / NTB