Koronaviruset trua planlagd skogplanting
Etter at koronasituasjonen trua årets planlagde skogplanting gir regjeringa 60 millionar kroner for å sørgje for at plantinga blir gjennomført.
Virussituasjonen har ført til mindre tilgang på sertifiserte, utanlandske sesongarbeidarar på grunn av grensekontroll og karantenereglar. Dermed har skognæringa fått store utfordringar med korleis dei skal gjennomføre årets planlagde skogplanting.
No opnar regjeringa for eit ekstraordinært tilskot på inntil 2 kroner per skogplante, til saman inntil 60 millionar kroner.
– Vi må prøve å unngå at all aktivitet i skogbruket stansar opp på grunn koronapandemien, seier landbruks- og matminister Olaug Bollestad (KrF) i ei pressemelding.
Pengane er skal gå til å dekkje kostnader til bruk av anna arbeidskraft, som rekruttering, opplæring og ekstraordinær oppfølging i felt.
Planteskulane har produsert om lag 28 millionar skogplantar for utplanting våren 2020.
(©NPK)
Illustrasjonsfoto: Stian Lysberg Solum / NTB scanpix