Kronprinsen og kronprinsessa skal hylle norske medaljegrossistar

Kronprins Haakon og kronprinsesse Mette-Marit deltek når regjeringa onsdag skal gjere stas på dei norske deltakarane i Special Olympics.

Publisert: 20.11.2023 kl 16:29

Special Olympics er det største idrettsarrangementet i verda for menneske med utviklingshemming. 7000 utøvarar frå 190 land konkurrerte i ulike idrettar i Berlin frå 17. til 25. juni i år.

Den norske troppen reiste heim med totalt 16 gull, 22 sølv og 13 bronsemedaljar i kofferten.

I alt 43 norske utøvarar konkurrerte i ti ulike idrettar. Noreg deltok i badminton, bowling, friidrett, golf, handball, judo, riding, rytmisk gymnastikk, symjing og turn.

Kommande onsdag skal deltakarane heidrast i representasjonsbustaden til regjeringa. Kultur- og likestillingsminister Lubna Jaffery (Ap) er vertskap.

Til stades er også kronprins Haakon og kronprinsesse Mette-Marit.

Den neste utgåva av Special Olympics skal arrangerast i italienske Torino i 2025.

(©NPK)

Kronprinsesse Mette-Marit og kronprins Haakon skal møte idrettsheltar onsdag. Foto: Terje Pedersen / NTB / POOL