Kugalskap oppdaga på gard i Skottland
For første gong på tre år er det oppdaga kugalskap på ein gard i Storbritannia, nærmare bestemt i Aberdeenshire i Skottland.
Regjeringa i Skottland har sett i verk tiltak for å hindre spreiing av sjukdommen, skriv The Telegraph.
Kugalskap (BSE) vart første gong påvist i Storbritannia i 1986. Sjukdommen kan i sjeldne tilfelle smitte menneske, som kan utvikle Creutzfeldt Jakobs sjukdom.
Ifølgje den skotske regjeringas sjefveterinær har kugalskapen som er oppdaga «ingen effekt på matsikkerheita».
Sist det vart påvist kugalskap i Storbritannia var i 2015, då ei heil besetning storfe måtte slaktast på ein gard i Carmarthenshire i South Wales.
(©NPK)
Illustrasjonsfoto: NTB scanpix