Kvinnedel på studium halvert utan kjønnspoeng

Opptaket i år er det første utan kjønnspoeng, og kvinnedelen har falle frå 50 til 24 prosent, skriv Adresseavisen.

– Det set oss ti år tilbake i tid, seier instituttleiar Monica Rolfsen ved NTNUs institutt for industriell økonomi og teknologileiing. Kunnskapsdepartementet fjerna kjønnspoenga ved seks studium, etter tilråding frå styret ved NTNU, men instituttleiaren er skeptisk til endringa.

– Vi åtvara mot å fjerne kjønnspoenga. Langt under halvparten av leiarane i næringslivet er kvinner, og det viser at vi har ein veg å gå, seier ho. Rolfsen seier det har vore jobba intensivt med kjønnsbalanse, og dei siste åra har det vore omtrent like mange kvinnelege som mannlege studentar.

– Men desse tinga tar tid, og dette har framleis ikkje gitt store ringverknader i næringslivet.

Også nanoteknologistudiet har fått ein markant nedgang i kvinnedelen etter at kjønnspoenga forsvann. (©NPK)