Kvinnedelen i norsk film på veg ned

(NPK-NTB): Kvinnedelen i norsk film er den lågaste på åtte år. Berre éin av fire regissørar, produsentar og manusforfattarar bak norske filmar i år er kvinner.

Det viser ein gjennomgang Aftenposten har gjort av dei 30 premiereklare kinofilmane i 2016. Berre seks av regissørane er kvinner, og det same talet gjeld for produsentar. Noko betre er situasjonen på manussida: Ti kvinnelege manusforfattarar sikrar ein prosentdel på 33,3. Fasiten for 2016 blir dermed 24,4 prosent kvinner.

Kvinnedelen har ikkje vore lågare sidan 2008 då 15 prosent av regissørar, produsentar og manusforfattarar bak norske filmar var kvinner.

Med to manus – til spelefilmen Børning 2 og ein dokumentar om sjakkesset Magnus Carlsen – er Linn-Jeanethe Kyed den som gjer mest for å halde kvinnedelen oppe. Ho er også i gang med å skrive manus for ein stor, dansk spelefilm som kjem neste år, skriv Aftenposten.

– Eg er veldig overraska over at det er så få kvinner i filmprosjekta i år. Eg ante verkeleg ikkje at situasjonen var så ille, seier Kyed.

Stortinget vedtok før jul at det skal vere ein kvinnedel på 40 prosent i nøkkelposisjonar i norske filmar. (©NPK)