Kvinneleg toppsyklist pressa av vegen av bil

(NPK-NTB): Den norske toppsyklisten Cecilie Gotaas Johnsen (40) er send til sjukehus med det som truleg er eit brot i skuldera. Ulykka skjedde fordi ein bilist bråstoppa framfor henne.

npk@npk.no

Publisert: 14.06.2016 kl 14:48

40-åringen syklar for Team Hitech og deltok for Noreg under sykkel-VM i Richmond sist sesong.

«En kvinnelig syklist er påkjørt av en bil i Osloveien ved Marienborg. Politiet søker nå etter en bil – en sølvfarget eldre stasjonsvogn», fortalde Trøndelag politidistrikt på Twitter klokka 11.45 tysdag.

Karl Lima, manager for Team Hitech, stadfestar overfor Adresseavisen at det er snakk om den trønderske toppsyklisten.

– Dette var svært beklageleg. Eg har fått ei melding om at ho var på veg heim frå trening, og at ein sint bilist kasta seg framfor henne og bråbremsa – slik at ho velta, seier Lima.

Adresseavisen har også snakka med John-Ivar Langtinn. Han var vitne til ulykka.

– Dette var gjort med vilje. Bilen girte ned og stakk av etterpå. Det er galskap, seier han til Adressa.

– Føraren bråbremsa, og syklisten måtte kasta seg i bakken for ikkje å hamna i ei alvorleg ulykke. Ho var i store smerter. Vi høyrde hylinga, seier Langtinn til avisa.

Politiet etterlyser no sjåføren som skal ha køyrt ein sølvfarga Opel Astra. Føraren blir skildra som «godt vaksen», opplyser operasjonsleiar Bjørn Handegard. (©NPK)