Lærarar lærer å legge elevar i bakken

Nærare 50 tilsette frå skular i Drammen har deltatt på kurset som hovudsakleg tar for seg praktiske øvingar, ifølge NRK.

– Vi fekk praktisert metodar for korleis vi kan skjerme utagerande barn på ein roleg og forsvarleg måte, seier Erika Enger, som er lærar i 7. klasse ved Åssiden skole.

– Det var hovudfokus på korleis vi skal skjerme eleven for å få ro og oversikt over situasjonen. Vi hadde ikkje hovudfokus på å legge elevar i bakken. Vi var innom det mot slutten av kurset, understrekar ho.

Pedagogisk-psykologisk rådgjevar Jorun Holth Eggen meiner skulane heller burde vore opptatt av førebyggjande arbeid.

– Ein må ha kunnskap og trening i å løyse konfliktar utan å ty til vald. Ein må heller gå på kurs for å lære korleis ein kan unngå å komme i slike situasjonar, seier ho.

Dagleg leiar Pål-Erik Ruud i Verge Opplæring, som arrangerte kurset i Drammen, seier metodane som dei lærer bort, er humane og profesjonelle og utvikla over lang tid. (©NPK)