Lei skade for RBKs nysignering – truleg ferdig for i år

Det stadfestar RBKs lege Reidar Due overfor Discovery.

– Han var til MR og CT måndag ettermiddag. Svara der, og den kliniske undersøkinga som er gjort av skuldra, viser at Adrian har skadar i bandstrukturar i skulderbogen. Det gjer at han er ute av aktiv fotball i tre månader, seier Due til kanalen.

Pereira rakk så vidt å debutere for RBK med eit kort innhopp mot gamleklubben Viking etter at han vart henta heim frå greske PAOK i slutten av august. Han kjem neppe tilbake på bana i år, sidan siste serierunde er 12. desember.

Venstrebacken skal ha armen i fatle dei to neste vekene, før han startar opptreninga av skuldra.

– Eg skulle endeleg finne tilbake til gleda med fotball, og så vart det motsett. Men eg skal sjølvsagt gjere alt eg kan for å komme så fort tilbake som mogleg, seier Pereira til rbk.no.

Han slepper sannsynlegvis operasjon.

(©NPK)

Adrian Pereira mistar truleg resten av sesongen etter å ha pådratt seg ein skulderskade på trening med Rosenborg. Foto: Carina Johansen / NTB