Lewandowski: – Mi tid i Bayern er over

Lewandowski er kontraktsbunden til den tyske seriemeisteren fram til sommaren 2023, men det har i fleire veker vore rapportert at han ikkje ønskjer å spele i klubben neste sesong. Årsaka skal vere at leiinga i klubben lenge venta med å tilby Lewandowski ny kontrakt.

Dei skal ha venta på Erling Braut Haalands svar på kvar han ønskte å spele kommande sesong.

På ein pressekonferanse med det polske landslaget måndag uttalte Lewandowski seg for første gong om saka.

– Det er bestemt. Mi tid i Bayern er over. Eg kan ikkje sjå for meg eit godt samarbeid etter det som har skjedd dei siste månadene, sa han.

Lewandowski bidrog med 50 mål på 46 kampar sist sesong, men i sommar må høgst truleg Bayern på utkikk etter ein ny storskårar.

– Det er klart for meg at ein overgang er den beste løysinga for begge partar. Eg håpar ikkje dei vil behalde meg berre for at dei kan, sa han.

Måndag stadfesta Bayern at også den franske midtbanespelaren Corentin Tolisso forlèt klubben. Han er på utgåande kontrakt og forlèt vederlagsfritt.

(©NPK)

Robert Lewandowski spelar ikkje for Bayern München neste sesong. Foto: Swen Pfoertner / dpa via AP / NTB