Likevel cupfinale for Juklerøds lag, blir spelt 1. august
Den belgiske cupfinalen i fotball mellom Brugge og Royal Antwerpen blir spelt 1. august, ei veke før den nye sesongen skal starte.
Det melde Belgias fotballforbund torsdag. Brugge får sjansen til å fullføre sin dobbelttriumf etter at klubben vart utropt til seriemeister då ligaen vedtok at serien ikkje kunne spelast ferdig.
Simen Juklerød hjelpte Royal Antwerpen til finale med 2-1-siger samanlagt over Kortrijk i semifinalen og såg fram til finale 22. mars, men finaledraumen såg ut til å ryke då sesongen vart avbroten av viruspandemien og deretter stoppa for godt.
Belgiske styresmakter har forbode alle store idrettskonkurransar i landet ut juli månad. Cupfinalen blir altså spelt dagen etter at forbodet går ut. Det skjer i Brussel utan tilskodarar.
Den nye sesongen i belgisk førstedivisjon skal etter planen starte 7. august.
(©NPK)
Simen Juklerøds belgiske klubb Royal Antwerpen får likevel spele cupfinale mot Brugge. Den er lagt til 1. august, ei veke før den nye sesongen startar. Her er Juklerød i aksjon under tida i Vålerenga. Foto: Fredrik Hagen / NTB scanpix