Lita støtte til høg skatt på vasskraft

(NPK-NTB): Vasskraft blir skattlagt mykje hardare enn olje og gass, ifølgje Energi Norge. I ei ny undersøking får ei slik skattlegging av vasskrafta lita støtte blant dei spurde.

npk@npk.no

Publisert: 01.06.2016 kl 13:47

I det årlege Klimabarometeret, som TNS Gallup står bak, seier berre 6 prosent av dei spurde at dei er einige i at produksjon av vasskraft bør skattleggjast betydeleg hardare enn utvinning av olje og gass.

Heile 70 prosent seier dei er ueinige i dette.

– Dette viser at det store fleirtalet av folket ser paradokset i at vasskraft skattleggjast hardare enn olje og gass. Vi treng meir levelege skatteforhold for vasskrafta, seier administrerande direktør Oluf Ulseth i Energi Norge.

Han meiner den høge skatten hemmar investeringar.

– Vi har eksempel på selskap som må betale over 100 prosent av resultatet sitt i skatt. Då blir det ikkje mykje igjen til investeringar, seier Ulseth.

Vasskraftverk betaler ein grunnrenteskatt til staten i tillegg til alminneleg skatt på overskotet. For å unngå at dette rammar investeringar, er normalavkastinga skjerma frå skattlegging. Energi Norge meiner likevel at auka samla skattetrykk kombinert med låge straumprisar i dag gjer det vanskeleg for mange kraftselskap å gjere dei investeringane som trengst.