Lokalavis kritiserer Manchester United: Treng nye leiarar

Dei raude djevlane rauk ut tidleg i både ligacupen og FA-cupen og etter meisterliga-exiten mot Atlético Madrid, endar det med endå ein sesong utan ein tittel. Europaligatittelen frå 2017 er det hittil siste trofeet til klubben.

I Premier League er laget 20 poeng bak serieleiar Manchester City med ni kampar igjen. United har ikkje vunne heimleg serie sidan 2012/13-sesongen, den siste med den legendariske manageren til klubben, sir Alex Ferguson.

Etter at Ferguson la opp, har i tur og orden David Moyes, Louis van Gaal, José Mourinho, Ole Gunnar Solskjær og Ralf Rangnick slite med å få skikk på klubben.

Rangnick er venta å gå over i ei konsulentrolle til sommaren, med klubben på leiting etter ein permanent trenar.

PSGs Mauricio Pochettino og Ajax-trenar Erik ten Hag, som begge òg rauk ut i åttedelsfinalen i Meisterligaen, er dei heitaste kandidatane til å ta over trenarjobben i United.

Manchester Evening News kritiserer dei fremste spelarane til klubben og nemner spesifikt kapteinen på laget, Harry Maguire, og Bruno Fernandes.

– Harry Maguire må miste kapteinsbindet for sitt eige beste. I tillegg er det for mange hissigproppar i troppen. Bruno Fernandes er ein fantastisk spelar, men å halde hovudet kaldt er ikkje ein av styrkane hans, skriv lokalavisa.

(©NPK)

Manchester Uniteds mest prominente spelarar slit med å halde hovudet kaldt, meiner lokalavisa Manchester Evening News. Foto: Dave Thompson / AP / NTB