Mange byte i Venstres gruppe: Nybø ute – Rotevatn inne

Som førre periode skal det sitje åtte representantar frå Venstre på Stortinget. Men det blir ein svært anna gruppe enn det var sist.

Med berre tre direktevalde må Venstre forsyne seg grovt av utjamningsmandata. Direktemandata til partiet går til svært profilerte politikarar på det sentrale Austlandet. Partileiar og kunnskapsminister Guri Melby er vald inn frå Oslo, på mandatet hennar forgjengar Trine Skei Grande har hatt dei siste fire periodane.

Ola Elvestuen blir òg vald inn på direktemandat frå Oslo og får sin tredje periode på Stortinget. Elvestuen var nestleiar i Venstre fram til 2020, og klima- og miljøminister i Venstres første to år i regjering. Det siste av partiets direkte valde inn er nestleiar og kulturminister Abid Raja, som får sin tredje periode frå Akershus.

Fem utjamningsmandat

Fem representantar kjem inn på utjamningsmandat. Det inkluderer Solveig Schytz frå Akershus og Grunde Almeland frå Oslo. Begge har vore vararepresentantar for høvesvis Raja og Elvesuten i den førre stortingsperioden.

Venstres andre nestleiar, klima- og miljøminister Sveinung Rotevatn, kjem òg inn på utjamningsmandat frå Hordaland. Han var inne på utjamningsmandat frå Sogn og Fjordane i 2013-2017, men vart ikkje attvalt. Rotevatn utkjempa ein hard nominasjonskamp i Hordaland mot tidlegare nestleiar Terje Breivik, som han no erstattar.

I Rotevatns gamle distrikt er det no Alfred Bjørlo som kjem inn. Han har vore ordførar i Eid og så i stad i Nordfjord i ti år. Bjørlo har profilert seg som «distriktspsykopat», eit kallenamn han visstnok skal ha fått frå Grande.

Det siste utjamningsmandatet til partiet fell til Ingvild Wetrhus Thorsvik i Vest-Agder. Ho er advokat og tidlegare varaordførar i Mandal, og stod på topp i både Aust- og Vest-Agder. Med dei 29 åra sine blir ho dessutan den yngste i stortingsgruppa.

Nybø ute

Blant dei profilerte Venstre-politikarane som ikkje kjem inn på Stortinget, er næringsminister Iselin Nybø. Ho sat på utjamningsmandat frå Rogaland i 2013-2017, men vart ikkje attvalt sist, og i år går utjamningsmandatet til Raudt.

Helsepolitikaren Carl-Erik Grimstad, som stod på topp i både Vestfold og Telemark, kjem heller ikkje inn på nytt. Veteranen André Skjelstad, som har tre periodar på Stortinget, fell òg ut frå Nord-Trøndelag.

Snittalderen for Venstres nye stortingsgruppe er 40,5, og er samansett av fem menn og tre kvinner.

(©NPK)

Leiartrioen i Venstre kan sjå fram til ein ny periode på Stortinget. F.v. nestleiar Sveinung Rotevatn, nestleiar Abid Raja, leiar Guri Melby.
Foto: Heiko Junge / NTB