Mann dømt til tvunge psykisk helsevern etter øksedrap
Ein 49 år gammal mann er dømt til tvunge psykisk helsevern etter drapet på Bjørg Marie Skeisvoll Hereid (67) i Haugesund tidlegare i år.
Haugaland tingrett slo fast at mannen ikkje er strafferettsleg tilrekneleg fordi dei meiner at han var psykotisk då drapet skjedde, skriv TV 2.
49-åringen vart òg erklært utilrekneleg då han i 2017 vart sikta for ran og valdtekt. Han vart domfelt første gong på 1980-talet og har ei årelang historie med rusavhengnad og psykisk sjukdom.
Kvinna som vart drepen, var ein tilfeldig forbipasserande. Ho vart funnen kritisk såra på Vår Frelsers gravlund i Haugesund 19. februar i år etter å ha vorte angripen med øks. Dagen etter opplyste politiet at ho døydde av skadane.
Forsvararen til mannen, advokat Erik Lea, har sagt at ein kan spørje seg kvifor ikkje mannen fekk behandling etter saka i 2017.
- Hadde han vorte dømt til tvunge psykisk helsevern den gongen, så ville dette aldri skjedd, sa forsvararen.
(©NPK)
Krimteknikarar på gravlunden i Haugesund der ei kvinne i 60-åra vart angripen med øks. Foto: Kjell Bua / NTB scanpix