Mann sikta for valdtekt og valdtektsforsøk

– Mannen er sikta for valdtektsforsøk. I tillegg er han sikta for ei fullbyrda valdtekt, stadfestar politiadvokat Inger-Lise Høyland overfor Bergensavisen.

Politiet vil ikkje gi nokon detaljar om valdtekta han er sikta for.

Mannen skal ha prøvd å valdta ei 24 år gammal kvinne på strekninga Torget og Fosswinckels gate i Bergen sentrum i 2.20-tida fredag morgon.

Men den 24 år gamle kvinna kjempa imot og klarte å rive seg laus frå mannen, då han skal ha prøvd å halde henne fast.

Mannen blei arrestert og sikta for valdtektsforsøket same dag. Fredag blei det kjent at siktinga mot mannen er utvida med ei valdtekt. Mannen blir framstilt for fengsling i Bergen tingrett laurdag morgon.

Politiet avhøyrde den sikta, den 24 år gamle fornærma kvinna, vitne og tipsarar fredag. (©NPK)