Mattilsynet: Avl på katterasen scottish fold i strid med dyrevelferdslova

I ei pressemelding skriv Mattilsynet at dei oppmodar til å la vere å avle kattar med folda øyre.

Scottish fold er namnet på ein kattetype som blir kjenneteikna av sine små, folda øyre. Dei folda øra kjem av sjukdommen osteokondrodysplasi.

Sjukdommen påverkar brusk- og beindanninga i heile skjelettet. Ifølgje Mattilsynet fører dette til at alle kattar med sjukdommen i varierande grad får leddbetennelsar, misdanna bein og hale, og dei kan få kroniske smerter og problem med å bevege seg.

Mattilsynet åtvarar om at å pare to kattar med anlegg for sjukdommen fører til at alle kattungane i kullet blir alvorleg sjuke. Dei meiner det ikkje er nokon gode grunnar til å avle kattar med slike helseproblem, og at det etter deira vurdering alltid vil vere i strid med dyrevelferdslova å pare kattar med to arveanlegg for osteokondrodysplasi.

Også ved avl der eitt av dyra med arveanlegg for sjukdommen vil det vere i strid med dyrevelferdslova, meiner Mattilsynet.

Kattetypen er ikkje allment anerkjend som ein katterase i Noreg. Men det er likevel ein populær kattetype. På Finn.no får ein 85 treff ved å søkje på «scottish fold».

Den amerikanske artisten Taylor Swift har to scottish fold-kattar og i Noreg hos Finn.no er maskoten Pusefinn av kattetypen.

NTB har bede Finn.no om ein kommentar til oppmodinga frå Mattilsynet, men har førebels ikkje fått noko svar.