Mbappé (15) trenar med PSG-stjernene: – Fantastisk med ballen

Den 15 år gamle midtbanespelaren har trass i sin unge alder allereie fått debuten sin på PSGs U19-lag og har også spelt i det som heiter Uefa Youth League.

Etter 4-3-sigeren over Troyes laurdag samla troppen seg på treningsanlegget, Camp des Loges, der fleire av spelarane køyrde individuelle opplegg i treningsrommet. Det opna for at ei handfull juniorspelarar kunne få trene med fleire av stjernespelarane.

Ein av dei var Ethan Mbappé.

Ifølgje avisa Le Parisien var det første gong supertalentet trena med A-laget.

– Han er ein fyr som jobbar hardt. Han har den rette innstillinga, og han er fantastisk med ballen. No byrjar han også å bli litt meir aggressiv, og det må han lære seg å kontrollere, seier U19-trenar Zoumana Camara til avisa.

– Eg behandlar han akkurat som alle andre. Eg veit at han heiter Mbappé, og eg trena bror hans. Når eg ser ansiktet til Ethan, blir eg mint om Kylian, men for meg er han som alle andre spelarar, seier han.

(©NPK)

Kylian Mbappés veslebror, Ethan, har fått trene med PSGs A-lag. Foto: Antonio Calanni / AP Photo / NTB.