Medium: Frank Lampard sparka som manager i Premier League-klubben Everton

Den engelske fotballegenda Frank Lampard skal ha fått sparken som manager i Everton etter svake resultat.

Publisert: 23.01.2023 kl 16:41

Både Daily Mail og Sky Sports hevdar å kjenne til avgjerda som skal ha vorte teken måndag.

Lampard har hatt ansvaret for Everton sidan 31. januar i fjor, men engelskmannen har ikkje klart å få sving på det blåkledde maskineriet.

Everton ligg på 19.-plass i Premier League med berre 15 poeng etter 20 serierundar. Liverpool-klubben står med åtte strake kampar utan siger i ligaen. Laurdag vart det 1–2 heime mot Brighton.

Lampard debuterte som trenar i Derby i 2018, der han oppnådde stor suksess. Sesongen etter tok han over roret i Chelsea, der det langt frå vart noka eventyrhistorie.

Klubblegenda fekk ikkje eingong fullføre to heile sesongar i sjefsstolen på Stamford Bridge.

Vel eit år seinare var han tilbake i manesjen då han tok over etter Rafael Benitez i Everton. Dei kongeblå låg då heilt nede på 16.-plass, fire poeng over Newcastle på nedrykksplass. Den tidlegare midtbanespelaren klarte likevel å berge plassen med eit nødskrik førre sesong.

Sidan Lampard tok over roret i Everton har klubben brukt over 800 millionar kroner fordelt på fem spelarsigneringar.