Menneskerettsorganisasjon slått konkurs

(NPK-NTB): Menneskerettsorganisasjonen GNRD, som i juni blei sikta for kvitvasking og heleri av Økokrim, er slått konkurs.

npk@npk.no

Publisert: 04.07.2016 kl 13:27

Konkursen mot menneskerettsorganisasjonen GNRD (Global Network for rights and Development) blei opna måndag etter kravet frå ein tidlegare arbeidstakar, skriv Stavanger Aftenblad.

GNRD-leiar Loai Deeb, som er sikta av Økokrim for kvitvasking av over hundre millionar kroner, har ikkje betalt lønn til tilsette. Sjølv nektar han for å ha gjort noko gale, og har i pressemeldingar lagt skulda på Økokrim.

Arbeidstakar Thomas Bechmann hevdar at organisasjonen skuldar han nesten 250.000 kroner for manglande lønn, feriepengar og seinkingsrenter frå 15. januar i år.

– Vi fekk beskjed heile tida om at pengane kom neste veke, så neste veke, så neste veke, seier Bechmann til avisa.

GNRD som blei grunnlagt i 2008 har hovudkontor i Stavanger, men organisasjonen har også samarbeidspartnarar i Austerrike, Belgia, Jordan, Spania, Sudan og Sveits, Dei foreinte arabiske emirat og Zambia.

Organisasjonen skal tidlegare ha hatt 35 tilsette i Noreg, og om lag 65 tilsette skal ha vore i arbeid i andre land. (©NPK)