Minst 17 jenter omkom i skulebrann i Thailand

– Brannen braut ut klokka 23 søndag. 17 jenter omkom, to er framleis sakna og fem er skadde, seier politisjef Prayad Singsin i Vingpatao-distriktet i provinsen Chiang Mai.

To personar er alvorleg skadde, opplyser Prayad. Han seier brannen er sløkt, men årsaka blir framleis etterforska.

– Skulen har elevar i alderen tre til 13 år, seier han.

Skulen blir driven av ei privat stifting, og elevane høyrer til fattige minoritetsgrupper i fjellområda nord i Thailand. Desse gruppene blir ofte ikkje nådd av offentlege institusjonar, noko som går ut over skulegang, helse og utvikling i regionen. (©NPK)